AS XUBIAS
AS XUBIAS

HISTORIA

 
                    AS ORIXES
 
       
O piragüismo e o remo afunden a súas raíces no pasado máis remoto da humanidade. A necesidade de transportarse por auga, quer por ríos ou lagos, quer polo mar tivo que ser respondida, e así nacen estes medios de navegación baseados na forza do propio tripulante.
 
Coma deporte, é sabido que no antigo Exipto xa se facían competicións no Río Nilo. O piragüismo é olímpico desde 1936.
 
  • Comezos do S.XX:
 
A comezos do S.XX prodúcese a chegada do remo de banco fixo á Galiza no ámbito deportivo. O mesmo é practicado no Norte da Península Ibérica, alcanzando a súa maior popularidade en Euskadi.
Tamén en Asturias e Cantabria alcanza certa consideración. Adoitaban ser regatas de festas populares dos pobos.
 
 
As regatas de San Fidel 1882, tradición que foi
morrendo en Carril (1)
 
Os mariñeiros do barrio das Xubias comezan a partir de 1904 a remar como Cofraría de Pescadores das Xubias, xerme da futura SD As Xubias. Tamén participan formando a práctica totalidade das tripulacións da Sala Clavet, Neptuno de Sta. Lucía, Liceo de Monelos, Gremio de Artesanos...
 
 
  • Anos 40: 
 
Prodúcese a explosión do remo de banco fixo, co nacemento das chamadas “Regatas de Traineras del Generalísimo”. Aparecen numerosos clubs: Portiño, S. Amaro, C.P. de Mera, CP de Sada, CP de Ferrol, Moaña, Meira...
 
Nace a nosa entidade, como “Educación y Descanso de Las Jubias”, que tomará o nome SD As Xubias cando ao final do franquismo se recoñeza o dereito de asociación. Os mariñeiros das Xubias, ademais de baixo esta bandeira, compiten coa Cofraría de Pescadores.
 
Os documentos que testemuñan a nosa aparición non se conservan, con que non se coñece a data exacta. Con todo, temos connosco fichas federativas dos anos 50, polo que como mínimo existimos desde eses tempos.
 
 
  • Anos 50:
 
Durante esta década, a E y D de Las Jubias raia a un alto nivel, até o punto de chegar a ser subcampións de España en batel.
 
Batel no "Retiro" de Madrid
 
  • Anos 60:
Hai unha decadencia xeral do remo de banco fixo. Na Galiza, só sobrevivimos nós e a “E y D Moaña”.
 
 
  • Anos 70:
 
O remo recupera a súa anterior vitalidade durante esta década, aparecendo numerosas entidades que se dedican a el.
 
 
 
 
Nós, E y D de Las Jubias, somos Campións Galegos de traíñas (en 1973 e 1974 as dúas derradeiras veces) e tamén de bateis en numerosas ocasións (en 1977 e 1978 as dúas últimas), o que nos converte en claros dominadores. Ademais, en 1975 somos cuartos no Campionato de España de bateis.
 
 
  • 1977:
 
Fúndase a SD As Xubias tal e como a coñecemos hoxe, a partir da E y D de Las Jubias, que xa contaba con case 30 anos nesa altura –certificados documentalmente- e que con grande probabilidade superaba os 30. Neste mesmo ano e no seguinte somos Campións Galegos de bateis.
 
 
 
  • 1983:
 
Aparece a sección de piragüismo e comezamos a competir a escala galega nestes primeiros anos. En remo, continúa a actividade a un bo nivel, con competicións en traíña e batel.
 
A SD As Xubias fai desde estes anos unha forte aposta por integrarse na sociedade e pola promoción do remo e do piragüismo, con especial atención aos máis novos. Organiza cursos de iniciación e perfeccionamento en ambos os deportes, e desde 1983 a Travesía da Ría do Pasaxe de Piragüismo.
 
 
  • Anos 90:
 
Nesta década ten lugar a explosión do piragüismo no Estado.
 
A partir de 1996, os padeeiros da SD As Xubias alcanzan vitorias e numerosas medallas en Campionatos Galegos e Campionatos de España. Tamén chegan medallas en regatas europeas, e algúns dos nosos deportistas acoden a concentracións, tanto a nivel da Galiza como de España, e compiten coma Selección Galega.
 
No remo, uns vándalos esnaquizan a nosa traíña, de xeito que nos vemos na obriga de competir apenas en batel e traineriña.
 
Entre tanto, os cursos da entidade herculina teñen atinxido unha grande popularidade e cada verán superan amplamente o centenar de participantes. Son a Escola Municipal de Remo e Piragüismo do Concello da Coruña, organiza as súas actividades connosco.
 
A Travesía da Ría do Pasaxe de Piragüismo consolídase no calendario galego, e chega a ser incluída na Liga Galega de Piragüismo.
 
 
 
  • Desde 2000 até hoxe:
 
A sección de piragüismo continúa a colleitar medallas en Campionatos Galegos, Campionatos de España e algunhas regatas internacionais. Tamén na liña dos anos 90, algúns dos nosos padeeiros forman parte da Selección Galega.
 
No 2002, formamos de novo unha traíña que competirá na Liga Galega durante toda a década, mentres continúa a actividade competitiva tamén en batel e traineriña.
 
Porén, nestes anos pasamos por máis mudanzas das nosas instalacións das que desexariamos. Son dificultades que conseguimos superar con esforzo.
A nivel de promoción, continúa a organización de cursos de iniciación e perfeccionamento, co apoio dos concellos da Coruña e de Culleredo. Ademais, diversos colexios, institutos e outros centros educativos organizan actividades a través de nós. A Travesía da Ría do Pasaxe avanza firme cara á trixésima edición, que será en 2013.
 
Máis de sesenta anos despois de que a Educación y Descanso de Las Jubias comezase a súa andaina, contamos con dúas seccións nas que competimos, e cumprimos unha importante función social a través dos nosos cursos e actividades. Temos conseguido grandes feitos, mais tamén superado tempos difíciles.

PATROCINADORES

COLABORADORES